Gen 2 | NdeIBE | STEP | Kanjalo amazulu lomhlaba kwapheleliswa ngakho konke ukuhlotshiswa okukhulu.

Genesis 2

1 Kanjalo amazulu lomhlaba kwapheleliswa ngakho konke ukuhlotshiswa okukhulu.

2 Ngosuku lwesikhombisa uNkulunkulu wayesewuqedile umsebenzi ayewenza; yikho ngosuku lwesikhombisa waphumula kuwo wonke umsebenzi wakhe. 3 Njalo uNkulunkulu walubusisa usuku lwesikhombisa walwenza lwaba ngcwele, ngokuba mhla walo waphumula kuwo wonke umsebenzi wokudala lokho ayesekwenzile.

U-Adamu lo-Eva

4 Lo ngumlando wamazulu lomhlaba ekudalweni kwakho. Kwathi uJehova uNkulunkulu esenze umhlaba lamazulu – 5 kungakaveli sihlahlana seganga emhlabathini njalo kungakamili lasihlahla bani seganga, ngoba uJehova uNkulunkulu wayengakanisi izulu emhlabeni, njalo kwakungelamuntu wokusebenza umhlabathi, 6 kodwa izintombo zantuntuza emhlabathini zathelela lonke iphansi –

7 uJehova uNkulunkulu wambumba umuntu ngothuli lomhlabathi waphefumulela emakhaleni akhe umphefumulo wokuphila, yikho umuntu wasesiba yinto ephilayo.

8 Kunjalo uJehova uNkulunkulu wayelungise isivande empumalanga, e-Edeni; wambeka khona umuntu ayembumbile. 9 Njalo uJehova uNkulunkulu wenza yonke imihlobo yezihlahla ukuthi zikhule emhlabathini – izihlahla ezazibukeka emehlweni njalo zinhle ekudleni. Phakathi laphakathi kwesivande kwakulesihlahla sokuphila lesihlahla sokwazi okuhle lokubi.

10 Umfula owawuthelela isivande wawugeleza usuka e-Edeni; ususuka lapho wadabukana waba yimifudlana emine. 11 Ibizo lowokuqala yiPhishoni; uzombeleza kulo lonke ilizwe laseHavila, lapho okulegolide khona.

12 (Igolide lalelolizwe lihle; amakha erezini leonikisi lawo akhona.) 13 Ibizo lomfudlana wesibili yiGihoni; uzombeleza kulo lonke ilizwe laseKhushi. 14 Ibizo lomfudlana wesithathu yiThigrisi; ubhoda ngempumalanga kwe-Ashuri. Njalo umfudlana wesine yiYufrathe.

15 UJehova uNkulunkulu wamthatha umuntu wambeka eSivandeni sase-Edeni ukuthi asisebenze njalo asinakekele. 16 Njalo uJehova uNkulunkulu wamlaya umuntu wathi, “Ukhululekile ukudla loba yisiphi isihlahla esivandeni; 17 kodwa ungadli isihlahla sokwazi okuhle lokubi, ngoba ungaze usidle uzakufa ngempela.”

18 UJehova uNkulunkulu wathi, “Kakukuhle ukuba indoda ibe yodwa. Ngizamenzela umsizi omfaneleyo.”

19 Manje-ke uJehova uNkulunkulu wayesebumbile ngomhlabathi zonke izinyamazana zeganga lazo zonke izinyoni zemoyeni. Waziletha emuntwini ukuthi aziphe amabizo; kwathi loba yikuthini asibiza ngakho isidalwa esiphilayo, kwaba yilona bizo laso. 20 Ngakho umuntu wapha amabizo kuzo zonke izifuyo, lezinyoni zemoyeni lazo zonke izinyamazana zeganga. Kodwa u-Adamu wayengelaye umsizi omfaneleyo. 21 Yikho uJehova uNkulunkulu wenza indoda yalala ubuthongo bokufa; kwathi khonapho isalele wathatha olunye ubambo lwendoda waseyivala leyondawo ngenyama.

22 Yikho uJehova uNkulunkulu wenza umfazi ngobambo ayeluthethe endodeni, wasemletha endodeni.

23 Indoda yathi, “Lo manje uselithambo lamathambo ami lenyama yenyama yami; usezabizwa ngokuthi ‘mfazi,’ ngokuba wathathwa endodeni.”

24 Ngalesisizatho indoda izadela uyise lonina imanyane lomkayo, bona babe nyamanye.

25 Indoda lomkayo babehambaze, bengelazo inhloni.